Татарстанда бер укучы кызны елан тешләгән
Татарстанның Алабуга муниципаль районында бер кыз баланы елан тешләгән. Бу хакта “Татар-информ” хәбәрчесенә Алабуга районы Эчке эшләр бүлегендә хәбәр иткәннәр.
Елан һөҗүменә 13 яшьлек кыз кичә, 29 нчы июньдә, “Радуга” санаторие базасында дучар була. Баланың санаторийга ял итәргә Зәйдән килүе мәгълүм. Полиция хезмәткәрләре әйтүенчә, зыян күргән бала Яр Чаллының Ашыгыч медицина ярдәме хастаханәсенә озатылган. Хәзер елан чагу очрагының барлык нечкәлекләре тәгаенләнә.
Әйтергә кирәк, Алабугада елан тешләү очраклары шактый еш күзәтелә. Былтыр да июль азагында, шәһәр читендәге бакчада җиләк җыйганда, 11 яшьлек кызны агулы елан чакканы турында хәбәр ителде. Үткән елгы җәйдә елан тешләү буенча моның өченче факт икәнлеге әйтелгән иде.