Татарстанда бер кызны элеккеге сөйгән егете урлаган һәм кыйнап торган
Кызы югалгач, әни кеше баласының бәлагә таруын аңлап алган һәм полициягә мөрәҗәгать иткән.
Казанда 32 яшьлек ир-ат элек очрашып йөргән 22 яшьлек сөйгән кызын урлап алып киткән һәм кыйнап торган. Хәзер аңа карата җинаять эше ачылган. Бу турыда Тикшерү комитетына сылтама белән «Татар-информ» хәбәр итте.
Тикшерү версиясе буенча, егет белән кыз очрашып йөри, аннары кыз аерылышу турында карар кабул итә. Шуннан соң ир-ат кызны эзәрлекли, яный башлый.
5 октябрьдә кич белән 32 яшьлек ир-ат дустын ияртеп килә һәм кызны эшеннән каршы ала, көчләп машинага утырта. Башта кызны бер фатирга алып киләләр, аннары ир-ат үзе арендалый торган фатирга алып кайталар.
Ир-ат кызны кыйный, үтерү белән яный.
Аннары кызның анасы баласының бәлагә таруын аңлап ала һәм полициягә мөрәҗәгать итә. Полиция хезмәткәрләре кызны коткара, ир-ат исә җинаятькә катнашы булуын кире кага.
«Кеше урлау» маддәсе буенча җинаять эше ачылган.