Татарстанда бер ир-ат дусларын вәхшиләрчә кыйнаган, бер кеше үлгән, икенчесе комада
Өч ир-ат бергәләп балыкка чыгып киткән булган.
Сарман районының Игәнә-Баш авылында фаҗига була. Исерек ир-ат иптәшләрен вәхшиләрчә кыйный, имгәнгән кешеләрнең берсе үлә, икенчесе комада ята. Бу турыда «Татар-информ» агентлыгына Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итте.
Фаҗига 21 июньдә була. Сарман авылында яшәүче ир-ат дуслары белән балыкка китә.
Иптәшләр шактый гына салып алгач, Игәнә-Баш авылына барып, ялны шунда дәвам итәләр.
Бер мизгелдә ир-атлар талаша башлый. Шул чакта Сарманда яшәүче ир-ат дусларын вәхшиләрчә кыйный. Шулай итеп бер ир-ат урында ук үлә, икенчесе комага китә.
Җинаятьтә шикләнелүче ир-ат үз гаебен өлешчә генә таный. Җинаять эше ачылган.