Татарстанда бер ир-ат балалар бакчасы сакчысын чәнчи, көчли һәм ут төртеп яндырырга маташа

Әлмәттә яшәүче ир-ат балалар бакчасында сакчы булып эшләүче хатын-кызны көчләгән һәм ут төртеп яндырмакчы булган. Әлеге ир-атка карата суд хөкем карары чыгарган. Бу турыда «Татар-информ»га Татарстан прокурорының өлкән ярдәмчесе Руслан Галиев хәбәр иткән.

«2018 елның 7 май төнендә әлеге ир-ат Әлмәттәге балалар бакчасының тәрәзәсен ватып, эчкә керә. Бакча ашханәсенә барып, ике зур пычак ала. Шулар белән 59 яшьлек сакчы хатынга ташлана. Хатынга пычак белән берничә тапкыр кадый. Имгәнгән хатынның каршы торырга хәле булмавыннан файдаланып, аңа карата сексуаль характердагы көчләү гамәлләре кыла», — дип сөйләгән Руслан Галиев.

Җинаятен яшерү өчен, бу кеше сакчы хатын яткан матрацка ут төртә. Шкафлардан балалар киемнәрен алып, шулар ярдәмендә җиһазларга һәм идәнгә ут төртмәкче була. Балалар бакчасында янгын сигнализациясе эшли башлый. Җинаятьче куркып кала. Корбанының телефонын урлый һәм чыгып кача.

Суд бу ир-атны ике маддә буенча гаепле дип тапкан һәм 16 елга ирегеннән мәхрүм иткән. Шуннан соң аның өчен тагын ел ярым сынау вакыты булачак.