Татарстанда бер ир-ат авариягә очраган машинадан очып чыккан һәм исән калган - видео
Йөк төялгән «Камаз» алдан акрын бара торган икенче «Камазга» бәрелгән.
Тукай районында Әлмәт трактында Түбән Кама шәһәренә борылыш тирәсендә коточкыч авария була. Биредә үзбушаткыч «Камаз» машинасы уң яктан бик акрын гына баручы икенче «Камаз» машинасына бәрелә. Бу турыда «Челнинские известия» хәбәр итте.
Акрын гына бара торган «Камаз"лар берсе икенчесен тарттырып алып баруы да ихтимал.
Икенче версия буенча, юлның бу участогында йөк машинасы йөртүчеләре үлчәүне алдарга тырыша. Имеш, акрын барсаң, артык йөк төялгәне теркәлми кала.
Акрын гына бара торган шушы ике йөк машинасы арттан килә торган «Камаз»га комачаулый. Үзбушаткыч «Камаз» зур тизлектә килгән килеш алдагы машинага бәрелә.
Видеокүзәтү камерасы кадрларыннан күренгәнчә, «Камаз» йөртүчесе бик бәхетле. Ул кабинадан очып чыга, шул мизгелдә кабина бәрелеп, чәлпәрәмә килә. Авариядән соң, йөртүче ир-ат аягына торып баса һәм бераз читкәрәк китә, диелә бу хәбәрдә.
