Татарстанда авыл буйлап машинада йөргән 17 яшьлек исерек кыз коточкыч авария ясаган
Тукай районының Иске Ерыклы авылында узган төндә 3 машина – «семерка», «ВАЗ-2114» һәм «Datsun on-DO» бәрелешкән. Бу турыда «Челнинские известия» яза.
Эчке эшләр министрлыгының Тукай районы буенча Дәүләт автоинспекциясе бүлеге җитәкчесе Шамил Ганиев сүзләренчә, «ВАЗ-2114» машинасы белән 17 яшьлек кыз идарә итә. Аның машина йөртү таныклыгы юк. Өстәвенә, кыз исерек була, аның канында 0,322 м/гл алкоголь булуы ачыклана.
Кызга карата административ кагыйдә бозу турында акт төзелгән. Машинаны штраф-стоянкага алып киткәннәр.