Татарстанда апрель аенда 2025 елның августыннан бирле беренче мәртәбә айлык дефляция теркәлгән. Россия Банкы мәгълүматына караганда, республикада бәяләр март белән чагыштырганда 0,06 процентка төшкән. Бу хакта «Татар-информ» яза.
Шул ук вакытта Татарстанда еллык инфляция март аенда 7,08 процентка, апрельдә 6,75 процентка акрынайган. Кимүгә дә карамастан, республика күрсәткече Идел буе федераль округы һәм Россия буенча уртача күрсәткечкә караганда, югары булып кала бирә.
Апрельдә Татарстанда азык-төлек бәясе төшкән, ә азык-төлек булмаган товарларга бәя үзгәрмәгән диярлек. Хезмәт күрсәтү бәяләре артуын дәвам иткән.
Үзәк Банкта әйтүләренчә, сезонлы факторларны исәпкә алмаганда, апрельдә республикада бәяләр элекке дәрәҗәдә калган. Динамикага аерым төр азык-төлекне җитештерү арту һәм рубльнең ныгуы тәэсир иткән.
Тулаем ил буенча да инфляция акрынаюын дәвам иткән. Росстат мәгълүматы буенча, апрельдә бәяләрнең айлык үсеше март күрсәткечләреннән сизелерлек түбән. Россия Банкы белдергәнчә, инфляцияне максат итеп куелган 4 процентка кайтару өчен акча-кредит сәясәте уздыруны дәвам итәчәкләр.