ТР Хөкүмәтенең юл хәрәкәте иминлеген тәэмин итү буенча комиссиясе күчмә утырышында юлларда иң күп аварияләр теркәлүче районнарны атадылар. Мәгълүматларны ТР Баш дәүләт автоинспекторы Рөстәм Гарипов китерде. Бу хакта «Татар-информ» хәбәр итә.
«Быелның беренче 5 аенда һәлак булучылар саны 2 тапкырга кимеде. Шул ук вакытта аварияләр саны Югары Ослан, Апас һәм Тукай районнарында артты», – дип сөйләде Рөстәм Гарипов.
Ул китергән статистикадан күренгәнчә, быелның 5 аенда муниципаль юлларда булган аварияләр саны узган елгыдан 67гә күбрәк булган. Зыян күрүчеләр саны 127 кешегә арткан. Шул ук вакытта һәлак булучылар саны 8 кешегә кимегән.
Быел җирле әһәмияттәге юлларда барлыгы 803 юл-транспорт һәлакәте теркәлгән, аларда 19 кеше һәлак булган һәм 972 кеше төрле дәрәҗәдәге җәрәхәтләр алган, диелә хәбәрдә.
