Татарстанда 2 яшьлек баласын кыйнап, салкын мунчага ябып тоткан хатынны хөкем итәләр
Шәмәрдән бистәсендә яшәүче 22 яшьлек хатын икенче бәбиен көтә.
Татарстанның Шәмәрдән бистәсендә 22 яшьлек хатынны баласын җәзалаган өчен хөкем итәләр. Бу турыда «Татар-информ» агентлыгына Татарстан прокурорының өлкән ярдәмчесе Руслан Галиев хәбәр итте.
Тикшерү версиясе буенча, 22 яшьлек хатын быел апрель һәм май айларында даими рәвештә ике яшьлек улын кыйный, кимсетә. Әни кеше сабыйны еш кына озакка салкын мунчада бикләп тота.
22 яшьлек бу хатын икенче баласын көтә, аның сигез айлык авыры бар. Ул ике яшьлек улын җәзалауда гаебен тулысынча таныган.
Бу хатынга карата «балигъ булмаган баланы тәрбияләү буенча вазифаларын башкармау» маддәсе буенча гаепләү белдерелгән.
Хәзер бу эшне судка җибәргәннәр.
