Татарстан Югары суды Актаныш районының элеккеге башлыгы Энгель Фәттаховны тикшерү изоляторында калдырды. Аның адвокаты, чик кую чарасын озайту белән риза булмыйча, шикаять бирергә тырышып карады.
Искәртеп үтәбез: 18 мартта Чаллы шәһәр суды Татарстанның элеккеге вице-премьеры һәм республиканың элеккеге мәгариф һәм фән министры Энгель Фәттаховның сак астында булуы вакытын озайтты. Барлык якларны да тыңлаганнан соң, суд гаепләүчеләр ягына басты һәм Энгель Фәттаховны 21 майга кадәр сак астында калдырды.
Тикшерүчеләр фаразлавынча, Татарстанның элеккеге вице-премьеры 2018 елның мартыннан 2020 елның сентябренә кадәр «Спецстрой» фирмасы белән 21,8 миллион сумга шәхси йортын реконструкцияләү турында килешкән.
Моның өчен Фәттахов районда махсус объектлар торгызу өчен подряд килешүләре төзегәндә булышырга вәгъдә иткән. Эштә Актаныштагы «Спецстрой» компаниясе ремонтлаган «Яшьлек» яшьләр үзәге дә катнаша.