2024 елның 21 апреленнән 12 июненә кадәр Татарстан халкы 2026 елда яңартылачак парклар, скверлар һәм ял итү зоналарын сайлады. Республика халкына тавыш бирү өчен 283 җәмәгать урыны һәм 812 ишегалды территориясе тәкъдим ителгән иде.
Гомумән алганда, 416 357 кеше тавыш биргән. Иң күп тавыш Казан халкыннан килгән – 130 057 кеше, аннан соң Чаллы – 56 113, һәм Түбән Кама – 28 905. Аеруча активлыкны Югары Ослан, Биектау, Чүпрәле һәм Мөслим районнары халкы күрсәткән.
Һәр 45 районда җиңүче территория билгеләнгән – алар киләсе елда төзекләндереләчәк. Тулы исемлекләр park.tatar һәм dvor.tatar порталларында урнаштырылган.
Казанда иң күп – 13 840 тавышны «Тәбриз» скверы җыйган. Ул Мәскәү районында урнашкан. Скверга капиталь ремонт таләп ителә: фонтан күптән эшләми, су белән тәэмин итү системасын һәм җиһазларны тулысынча яңарту кирәк.
Чаллыда Фикрәт Табиев исемендәге яр буе зонасы җиңгән (12 457 тавыш). Яр буен төзекләндерү 2023 елдан дәвам итә, анда инде күләгәле ял зоналары, балалар һәм спорт мәйданчыклары барлыкка килгән.
Түбән Камада тавыш бирү нәтиҗәләре буенча шәһәрнең төп җәмәгать киңлекләреннән берсе булган «Гаилә» паркы үсешен дәвам итәчәк.
Зур шәһәрләрдә халык күбрәк парклар һәм яр буйларына өстенлек бирсә, кайбер районнарда урамнар һәм үзәктәге мәйданнарга өстенлек бирелә. Мәсәлән, Яңа Чишмәдә Ленин урамы яңартылачак, ә Алексеевскида үзәк квартал төзекләндереләчәк.
Татарстан шәһәрләрен үстерү институты директоры Наилә Зиннәтуллина сүзләренчә, авылларның үзәк урамнары шәһәрдәге сәүдә үзәкләре кебек – анда халык әйбер сатып алырга, хезмәтләр алырга һәм аралашу өчен килә. Шуңа күрә төзекләндерү ремонтны гына түгел, ә бу киңлекләрнең визуаль, социаль һәм мәдәни әһәмиятен арттыруны да күздә тота.
812 ишегалды арасыннан халык 200 территорияне сайлаган – алар 2026 елда Татарстан Республикасы Рәисе Рөстәм Миңнехановның «Безнең ишегалды» программасы буенча төзекләндереләчәк. Ишегаллары өчен 194 710 кеше тавыш биргән.
Җиңүчеләр исемлеге dvor.tatar сайтындагы «Документлар» бүлегендә урнаштырылган һәм программа картасында күрсәтелгән. 2026 елда төзекләндереләчәк ишегаллары - кишер төсе, 2025 елныкылар – шәмәхә төс белән күрсәтелгән.
Чаллы халкы бик актив булган: ГЭС бистәсенең 4А комплексында яшәүчеләрнең 95% (1500 кеше чамасы), ә Яңа шәһәрнең 37 нче комплексында 46% (2909 кеше) тавыш биргән.
Яшел Үзәндә Энгельс урамындагы ишегаллары исемлеккә кергән.
Бөтенроссия тавыш бирү «Тормыш өчен инфраструктура» илкүләм проектының «Уңайлы шәһәр мохитен формалаштыру» федераль проекты кысаларында үткәрелә.
Татарстан Республикасы Рәисе Рөстәм Миңнеханов 2019 елда «Безнең ишегалды» Татарстан ишегалларын төзекләндерү программасын башлап җибәрде. Татарстан Төзелеш министрлыгы мәгълүматлары буенча, программа эшли башлаганнан бирле республикада 5174 ишегалды яңартылган.
