Татарстанда интернетта һәм массакүләм мәгълүмат чараларында беспилотниклар һәм һава һөҗүменә каршы оборона чаралары (ПВО) турында мәгълүмат таратуны рәсми рәвештә тыйдылар. Бу боерыкны Татарстан Рәисе Рөстәм Миңнеханов имзалады, дип яза «Татар-информ».
Теләсә нинди мәгълүмат, шул исәптән фото һәм видеолар тыела:
- Дроннар куллану, аларның нәтиҗәләре, шулай ук аппаратларның төрләре, аларны җибәрү, төшү һәм очу урыны турында;
- Татарстан территориясендә һава һөҗүменә каршы оборона системалары эше һәм радиоэлектрон көрәш турында;
- Һава һөҗүменә каршы әлеге оборона чараларының урнашу урыны турында мәгълүмат;
- ПВО объектларының урнашу урынын күрсәтергә мөмкин булган теләсә нинди башка мәгълүмат.
Бу тыю дәүләт хакимияте – федераль, республика һәм җирле органнар тарафыннан белдерелгән рәсми хәбәрләргә кагылмый. Бу хәбәрләрне бары тик шушы рәсми чыганакларга сылтама белән генә таратырга ярый.
Бу чикләүләр алдарак Россия Президенты указы белән кертелгән махсус режим (база әзерлеге режимы) гамәлдән чыгарылганчы дәвам итәчәк, диелә хәбәрдә.