Татарстан турында дистәләрчә фильм төшергән Риоритта Рубцова вафат
Риоритта Рубцова гомеренең күпчелек өлешен Казан телевидение студиясенә багышлаган.
Кичә Татарстанның атказанган сәнгать эшлеклесе Риоритта Рубцова 79 яшендә вафат булган. Бу турыда «Татарстан» телевидениесе хәбәр итте.
Хөсәен Ямашев премиясе лауреаты, кино өлкәсендә союз күләмендәге бүләкләр иясе Риоритта Рубцова гомеренең күпчелек өлешен Казан телевидение студиясенә багышлаган, аннары «Татарстан» ДТРКда эшләгән. Ул дистәләрчә документаль, нәфис, музыкаль фильм төшергән.
Риоритта Рубцованың «Кырлай» фильмы 1975 елда Тблисида узган кинофестивальдә иң яхшы фильм дип табылган.
Соңгы елларда Риорита Александровна танылган пианиночы Рэм Урасин белән иҗат итә. Алар Татарстанның милли һәм классик музыкаль мирасын дөньяга таныту өчен эшли.
Мәрхүмәне бүген Арча зиратына җирләделәр, диелә бу хәбәрдә.