Татарстан табиблары бер хатынның кулында үскән 20 килолы шешне кисеп алган
Табиблар өч сәгать дәвамында катлаулы операция ясый.
Түбән Кама табиблары кулына 20 килолы шеш үскән хатынга ярдәм иткән. Ул 2008 елда онкология бүлегендә дәваланган. Катлаулы операциядән соң, уң кулында лимфостаз башланган, шеш барлыкка килгән. 2020 елда кул бик нык зурая башлый, хатын теләгән киемен кия алмый, өйдән чыга алмый. Бу турыда «Татар-информ» Түбән Кама үзәк район күп профильле хастаханәсенең матбугат хезмәтенә сылтама белән хәбәр итте.
Чираттагы консультация вакытында табиблар шешне алырга карар кыла. Хирургия бүлеге җитәкчесе Муртазали Рамазанов һәм табиб-хирург Марат Гатауллин катлаулы операция ясый. Ул өч сәгать дәвам итә. Шешнең гомуми авырлыгы 20 кило булып чыга. Бәхеткә, ул яман шеш түгел.
Авыру хатынның кәефе яхшы булу да ярдәм итте, ди табиблар.
Шешеннән азат ителгән хатын да табибларга, биредәге барлык хезмәткәрләргә рәхмәт әйтә.