Мөселманнарга көн саен билгеле бер вакыт аралыгында гаджетлар куллануны чикләргә кирәк. Бу хакта Татарстан Республикасы мөселманнары Диния нәзарәте рәисе Камил Сәмигуллин яшьләр алдында ачык лекция вакытында сөйләде.
«Мондый тынлык баш миенә мәгълүматны тәртипкә китерергә һәм төркемләргә мөмкинлек бирә. Ә баш миебез шалтыратуларны һәм хәбәрләрне көтеп торганда, ул нәрсәне дә булса ятлый һәм истә калдыра алмый», – диде мөфти.
Шулай ук Сәмигуллин баш мие эшчәнлеген даими рәвештә стимуллаштырып торырга кирәклеген әйтте. Аның сүзләренчә, моны эшләмәсәң, вакыт узу белән баш мие эшчәнлеге йомшарачак.
«Шуңа күрә баш миен даими эшләтү мөһим: текстлар ятларга, хәтерне үстерергә, игътибарны күнектерергә кирәк», – дип өстәде ТР мөселманнары Диния нәзарәте рәисе.