Татарстан кызы Мәскәүдә пластик хирургия клиникасында үлгән
28 яшьлек кыз липоксация ясату өчен пластик хирургия клиникасына мөрәҗәгать иткән булган.
30 гыйнварда Мәскәүдә пластик хирургия ясый торган шәхси хастаханәләрнең берсендә липоксация процедурасы ясагач, 28 яшьлек кыз вафат булган. Бу турыда НТР 24 каналы Росздравнадзор сайтына сылтама белән яза.
Әлеге вакыйгадан соң тикшерү башланган.
«Московский комсомолец» басмасы белешмәсе буенча, мәрхүмә кыз Түбән Камада туып-үскән. Ул клиникага декабрьдә үк мөрәҗәгать иткән, операция 29 гыйнварда булган. Ул компрессион костюм кидергәннән соң икенче көнне үлгән. Кызның йөрәге кисәк кенә туктаган. Клиника хезмәткәрләре дә, ашыгыч ярдәм табиблары да аны коткара алмаган. Кыз аңына килмичә вафат булган, диелә хәбәрдә.
