Татарстан кибетләрендә дуңгыз ДНКлы "хәләл" колбаса бар икәне ачыкланды
"Царицыно"ның "Говяжья особая" колбасасында Краснодар лабораториясе дуңгыз ДНКсын тапкан. Ә бу колбасада Татарстанның «Центр по Аудиту и Контролю „Халяль“» оешмасының хәләл сертификаты бар. "Магнит" кибетләрендә салган бу колбаса турында Төньяк Кавказ мәгълүмат чаралары да язып чыкты.
Лабораториядә бу колбасада сыер итенең бөтенләй булмавы турында язалар. "Царицыно" "Татар-информ" журналистларына җавап бирми.
Ә «Центр по Аудиту и Контролю Халяль» оешмасының директоры Динар Садыйков үзен гаепләү белән килешми.
"Дуңгыз ДНКсы продукцияне хәрәм итә дигән бер генә дин әһеленең фәтвәсе дә юк", - ди ул.
"ДНК тикшергәндә күләм каралмый. Хәрәмме-юкмы икәнен билгеләгәндә, дуңгыз итенең күләме карала. Ә ДНК ысулы булганда, ул реакцияне генә күрсәтә, хәләл юнәлешендә бу ысул кулланылмый", - ди ул. Ягъни, дуңгыз ите бик аз, димәк, ярый булып чыга.
Ул кирәкмәгән урында тавыш чыгаруда гаепли һәм тестның хаталы булу ихтималын әйтә.
Садыйков «Царицыно» оешмасына инде 4 ел буе хәләл сертификатын бирә. Ул элегрәк Татарстанның Диния нәзарәтенең хәләл комитетында эшләгән иде.
Әле күптән түгел генә Татарстанда "Челны-мясо" оешмасын дуңгыз итенә "хәләл" дип язылган стикерлар ябыштыру сәбәпле, гауга чыкты. Нәтиҗәдә, комитет җитәкчесе Марат Низамов вазифасыннан алынды.
