Татарстан эчке эшләр министры итеп Дамир Сатретдинов билгеләнгән – «Вести-Татарстан»

Татарстан буенча эчке эшләр министры итеп 51 яшьлек генерал-майор Дамир Сатретдинов билгеләнгән, дип хәбәр итә «Вести-Татарстан». Бу хакта указга Владимир Путин 29 февральдә имза куйган.

Элекке министр Артем Хохорин 2023 елның 30 декабрендә эшеннән китте. Вакытлыча вазифаларны Алексей Соколов үтәп торды. Яңа министр кем булыр, дигән күпсанлы фаразлар әйтелде, әмма беркем дә, Сатретдинов булыр, дип әйтә алмаган иде.

Дамир Растямович Сатретдинов 1972 елның 20 июнендә Әстерханда туган. 1994 елдан – Эчке эшләр министрлыгында. Әстерхан шәһәрендә икътисади җинаятьчелеккә каршы көрәш бүлегендә эшли башлаган. Өлкән оперуполномоченный, бүлек урынбасары, бүлек җитәкчесе булып эшли. 2012 елда – Әстерхан өлкәсе буенча икътисади җинаятьчелеккә каршы көрәш идарәсе урынбасары, 2014 елда – идарә җитәкчесе. 2017 елдан – Әстерхан өлкәсе полиция начальнигы.

2020 елның февралендә Хакасия буенча эчке эшләр министры урынбасары итеп билгеләнә, 2020 елның октябрендә – Ханты-Манси автоном округы буенча эчке эшләр идарәсе җитәкчесе.

2021 елдан – генерал-майор.