ТР мөселманнары Диния нәзарәте Татарстан мөфтие Камил хәзрәт Сәмигуллин исеменнән телефон аша мошенниклык очраклары турында кисәтә. Бу турыда Нәзарәт сайтында хәбәр ителә.
«Шәхси яки хезмәтегезгә кагылышлы мәгълүматны, шулай ук акча күчерүне сорап шалтыратучыларга һәм шикле хәбәрләргә җавап бирүдән сакланыгыз. Мошенниклар корбаны булмас өчен, барлык дини сораулар һәм мөселман учреждениеләре эшчәнлеген оештыру мәсьәләләре буенча консультацияне Татарстан мөфтияте мөхтәсибләренә мөрәҗәгать итеп алырга киңәш итәбез», диелә хәбәрдә.
- ТР мөселманнары Диния нәзарәтендә call-үзәк эшли, аның аша Нәзарәтнең шәригать белгечләреннән җавапларны бушлай 8 800 222 76 67 телефоны аша алырга мөмкин. Шулай ук Татарстан Мөфтие Камил хәзрәт Сәмигуллин Диния нәзарәтенә караган мәсьәләләр буенча гражданнарны шәхсән кабул итә. Язылу өчен телефон: +7 (843) 237-94-53.