«Энергетик» бакчачылар ширкәтендә яшәүчеләр Биоресурслар буенча ТР Дәүләт комитетының Тукай районы бүлегенә мөрәҗәгать иткән. Бакчалар Аккош күле янында урнашкан, анда еш кына аккошлар төшә һәм инде очып китә алмый. Белгечләр аларны тотып, сулыкларга җибәрәләр. Бу хакта «Челнинские известия» хәбәр итә.
Татарстан халкы кыраулар төшү белән көньякка очып китмәгән аккошларның язмышы өчен борчыла. Гадәттә, бу кошлар – соң китә торган мигрантлар һәм төбәктә ноябрь ахырына кадәр яки хәтта кыш буе тоткарланырга мөмкин. Әгәр сулыкта боз катмаса, аккошлар кышларга да кала ала. Боз катканда, кош үзе башка урын таба – табигый процессларга тыкшынырга кирәкми.
Кайвакыт аккошлар шәһәр күлләрендә кала, аларны даими рәвештә шәһәр халкы ашатып тора. Шул ук вакытта әлеге кошлар салкынга чыдам, аларның май запаслары табигый җылыткыч булып хезмәт итә.
«Дача берләшмәсендә аккошлар, гадәттә, җиргә төшә, ә аннары шунда тоткарланалар. Бакчачылык ширкәтендәге күл кечкенә, һәм кошлар очып китә алмый, аларга ярдәм итәргә туры килә. Ләкин моны алар имгәнгән булса гына эшләргә кирәк. Әгәр дә сез кошларга ярдәм кирәк дип уйлыйсыз икән, бу хакта Хайваннар дөньясын саклау өлкәсендә инновацион технологияләр кертү үзәгенә (телефон номерлары: 8(843) 211-75-06, 8 (843)211-79-06) яисә биоресурслар буенча Татарстан Республикасы Дәүләт комитетының район (районара) бүлекләре башлыкларына мөрәҗәгать итегез», – ди Биоресурслар буенча ТР Дәүләт комитетының Тукай районы бүлегенең биотөрлелек торышына дәүләт күзәтчелеге бүлеге әйдәп баручы белгече Иван Тятюшкин.