Татарстан авылларында медицина хезмәткәрләренә бер тапкыр өстәмә түләү биреләчәк
Татарстан авыл җирендә, шәһәр тибындагы бистәләрдә һәм кече шәһәрләрдә эшләүче медицина хезмәткәрләренә түләүләр өчен өстәмә финанслау алачак. Республика 18 төбәк арасына кергән, алар арасында 303 млн сумнан артык акча бүленәчәк. Бу турыда документ Россия Хөкүмәте рәсми сайтында чыкты.
Өстәмә акчалар табибларга һәм урта медицина персоналына бер тапкыр бирелә торган компенсация түләүләренә юнәлтелә. Россия Премьер-министры Михаил Мишустин сүзләренчә, финанслау ил буенча авыл җирләрендәге, кече шәһәрләрдәге һәм ерак бистәләрдәге медицина оешмаларына якынча 500 белгеч җәлеп итәргә мөмкинлек бирәчәк.
Түләүләр «Авыл табибы» һәм «Авыл фельдшеры» программалары кысаларында башкарыла. Алар табибларга, фельдшерларга, шәфкать туташларына һәм акушеркаларга кагыла.
Белгечнең белеме һәм эш урынына карап, түләү күләме 500 мең сумнан 2 млн сумга кадәр тәшкил итә. Программаларның гамәлдә булу вакыты 2030 елга кадәр озайтылган.