Татарча җырларны кычкыртып тыңлаган өчен, Миндияр абыйга күршесе пистолеттан аткан

Чиләбедә яшәүче ир-ат кычкыртып татарча җыр тыңлаган күршесенең аягына аткан. Зыян күргән ир-ат авыру хатынының өянәкләре вакытында татар халык җырлары куша торган булган. Хәзер полиция тикшерү уздыра. Бу хакта 74.RU сайты яза.

Ural Mash хәбәр иткәнчә, зыян күргән ир-атның исеме Миндияр, хатыны Фәния Паркинсон авыруыннан интегә. Даруларны режимны бозмыйча, кичке 10да эчәргә кирәк. Әмма ул көнне Фәниянең өянәге 1 сәгатькә иртәрәк, 21:00 сәгатьтә башлана. Дару эчергәнче, ире татар халык җырлары җырлата башлаган.

«Татар җырлары өске катта яшәүче күршесенә дә ишетелгән, югыйсә, ул үзе ремонт ясаганда идәндәге тавыш изоляциясен алып ташлаган була. Хатыны белән бергә 7 катка төшә һәм бусагадан ук Миниядрга ташлана. Җырның тавышын ябуны сорыйсы урынга, бу патронлы пистолет куллана», – дип яза Ural Mash.

Зыян күргән ир-атны «ашыгыч ярдәм» белән алып китәләр, аның тезе яраланган була. Хатынына даруларны билгеләнгән вакытта эчертергә өлгерми кала. Полициягә Минидиярның улы мөрәҗәгать иткән, дип хәбәр иттеләр Эчке эшләр министрлыгында.

«Калинин районы полициясенә зыян күргән ир-атның улы күршесенә гариза язган. Фатирда низаг килеп чыга. Тавыш чыгарган ир-атның пистолеты була, ул шуннан күршесенең тезенә аткан», – дип сөйләгәннәр төбәкнең Эчке эшләр министрлыгы идарәсендә.