Татарча «Ирония судьбы»ның дәвамы: Руслан – Нәгыймованы, аннан Яруллинны тәрәзәдән ата...
«Интертат» бер төркем татар артистларының «Ирония судьбы» фильмының татарча версиясен төшерүен язган иде.
«Ирония судьбы» татарча: Марат Яруллин, Асылкаеваны ташлап, Ильмира Нәгыймовага китә. Әлеге 20 минутлык фильм күпләрнең күңеленә хуш килгән. Халык фильмның дәвамын көтә. Сценарий язып бирүчегә акча әрәм итмәскә дә була – кайберәүләр аның сюжетын уйлап тапканнар инде. Мәсәлән, бер ханым фикеренчә, фильмның дәвамында, һичшиксез, Руслан Кираметдинов та катнашырга тиеш. Ул бу хакта Русланның үзенә дә язып җибәргән. Кираметдинов кызыклы хат белән сторисларында бүлешә.
«Руслан Кираметдинов белән икенче сериясен көтәбез. Руслан кайтып, башта – Нәгыймованы, аннан Яруллинны тәрәзәдән ата да калган артистлар белән хәмер эчә. Аннан Русланны Ринат Рахматуллин янына колониягә ябалар. Алар анда икәүләп дуэт җырлыйлар. Элвин Грей аларның хәлен белергә килә һәм андагы сакчы ханымга гашыйк була. Аларның улы туа. Аңа Александр I дип исем кушалар да «тәпиен» бергәләп юалар. Руслан, Ринат белән бергә өч тавышка җырлыйлар», – дип язган ул.
Руслан Кираметдинов бу фикергә җавабын көлеп тора торган смайллар белән генә аңлаткан.
Сез мондый фильм карарга теләр идегезме?