Татар-Малай хатыны бала тапканда янәшәсендә булган: «Бала ул — могҗиза»
Хатыны бала тапканда янәшәсендә булган Ринат Галиәхмәтов ир-атларга яхшы бала тудыру йортына алдан акча җыярга киңәш иткән. «Бүләк ясагыз хатыннарыгызга», — ди ул.
Татар блогеры Ринат Галиәхмәтовның (Татар Малай) әти булуы турында язган идек. Бәхетле әти тормыш иптәше белән кызын бала тудыру йортыннан өйгә алып кайткан. Ул бу турыда үзенең инстаграм сәхифәсенә язган.
Ринат, кызын күргәннән соң, күңелендәге беренче хис-тойгылары белән уртаклашкан. «Тулгак тоту башланганнан алып, кызыбыз дөньяга килгәнгә кадәр, унике сәгать гел Илүзәм белән бергә булдым. Аннары тагын ике көн, ике төн кызларыма булышырга тырыштым. Егетләр, тормыш иптәшләрегезне бала тудыру йортына илтеп китеп куйгач эш бетте дип уйларга ярамый. Бергә ясагансыз икән, ахырына кадәр бергә булырга кирәк.
Сез белсәгез иде, күпме көч, күпме энергия сарыф итәләр безнең җаныкайларыбыз. Әлбәттә, без физик яктан булыша алмыйбыз, ләкин яннарында булу, кулларыннан тоту, кочаклау, аралашу аларга зур көч бирә.
Егетләр, менә машина яки фатир сатып алу өчен алдан акча җыябыз бит. Мөмкинлегегез булса, яхшы бала тудыру йортына да алдан акча җыярга кирәк. Бүләк ясагыз хатыннарыгызга.
Бала бит ул — могҗиза, ә булачак әниләр — фәрештәләр! Бала тапкан хатын-кызлар, әниләр янында баш иям! Әйе, баланы кулга тоткач, барлык авыртулар онытыла, диләр. Ләкин мин беләм, сез батырлардан батыры! Мең рәхмәт сезгә», — дип яза ул.
Ринатның тормыш иптәше Илүзә баланы мөселман кагыйдәләре буенча эшләүче, түләүле бала тудыру йортында тапкан. «Хәләл ризыклар гына ашаталар, акушеркалар да бары тик хатын-кызлар гына. Без алдан ук махсус шуның өчен акча җыйдык», — дип ачыклык кертә Ринат.
Әлеге пост инстачыларның блогерга карата хөрмәтен тагын да арттырган. «Ринат, син әти булган көнеңнән үк күпләргә үрнәк әти! Афәрин! Исән-сау булып үсегез!», «Кечкенәгез, үзегез шикелле игелекле бала булып, тигезлектә, саулыкта, муллыкта үссен», — дип яза алар.