Татар эстрадасы артистлары Хәния Фәрхинең «Әлдермешкә кайтам әле» җырын башкара
Тәслимә Низами сүзләренә, Урал Рәшитов көенә иҗат ителгән «Әлдермешкә кайтам әле» җыры - меңләгән кешенең күңелендә, йөрәгендә, телендә яңгыраган җыр. Көе яңгырый башлагач ук, Татарстанның халык артисты Хәния Фәрхи күз алдына килеп баса.
Әлеге видеоны җырчының кызы Алсу Инстаграм битенә урнаштырган. «Әниебезнең якты истәлегенә багышлана. Бергәләп яраткан җырыбызны җырлыйк», — дип язган ул.
Ә бүген мәрхүмәнең истәлегенә аның хит булып яңгыраган җырын татар эстрадасы артистлары башкара.
Әлеге җырны Хәния Фәрхинең олы кызы Алия, татар эстрадасы артистлары Илсаф, Раяз Фасыйхов, Айдар Галимов, Алсу һәм Азат Фазлыевлар, Гөлнара Габидуллина, Алсу Әбелханова, Гүзәл Идрисова, Илназ Баһ, Айгөл Бариева, Лилия Муллагалиева, Айгөл һәм Ришат Шәйхетдиновлар, Сиринә Зәйнетдинова, Илсөя Бәдретдинова, Чулпан Йосыпова, Илназ Сафиуллин, Вадим Захаров, Элмира Сөләйманова бергәләп башкаралар. Видео легендар җырчыбызның матур фотолары белән үрелеп бара.
Инстачылар җырны бик җылы кабул иткән.
«Урыны оҗмахта булсын», «Шәп килеп чыккан, афәрин, Хәния апаның рухы шат булсын», «Хәния Фәрхине беркем алыштыра алмас», «Бик сагынабыз шул», «Эх, тагын бер концертына барасы иде», — дип язганнар алар.