Россия Хөкүмәте ташламалы автокредит программасын 2026 елга кадәр озайтты. Шулай итеп, киләсе 3 елда әлеге программага ярдәм өчен 30 млрд сум бүлеп бирәләр. Бу турыда илнең Премьер-министры Михаил Мишустин әйтте.
«Татар-информ» белешмәсе буенча, әлеге программа гражданнарның билгеле бер категорияләренә машина бәясенең 25 процентына кадәр ташлама алу мөмкинлеге бирә.
Хөкүмәт әлеге программаны киңәйтте. Яңа төзәтмәләр буенча әлеге тәкъдимне инвалидлар, медицина хезмәткәрләре, укытучылар, махсус хәрби операциядә катнашучылар һәм аларның гаилә әгъзалары ала ала.
Программа буенча алып була торган машиналар исемлеге: «ВАЗ», «УАЗ», «ГАЗ», Тула өлкәсендәге заводта җитештерелгән «Haval», шулай ук «Evolute» һәм «Москвич 3е» электромобильләре.
Әлеге программа буенча Россия электромобильләрен алу өчен ташлама 35 процентка кадәр арттырыла. Ләкин аның күләме 925 мең сумнан артык булмаска тиеш, диелә хәбәрдә.