Ташкабак өлгергән чор җиттеме, бакчачылар аны кая урнаштырырга белми «азаплана» башлый. Хуҗабикәләр икрасын да ясап карый, салат итеп, турап, кышкылыкка банкаларга да тутыра. Кыздырып та ашап карыйбыз, пешереп тә. Таныш-белешкә, күрше-күләнгә дә әзрәк «төртәсең». Ә ул бетми дә бетми... Чаллыда яшәүче Ольга Созонова ташкабактан әзерләп була торган бик тәмле яңа рецепт белән бүлеште. Бу креветкалы крем-ашны бер тапкыр пешереп карасагыз, ташкабакны кая куярга микән, дип, башка аптырамаячаксыз, ди хуҗабикә. Бу хакта «Челнинские известия» яза.
Крем-ашны әзерләү өчен кирәкле ингредиентлар:
- 500 грамм ташкабак;
- 1 суган;
- 1 кишер;
- 0,5 литр шулпа;
- 150 грамм 30 процентлы каймак;
- 30 грамм ак май (пассировка ясау өчен);
- Тоз, тәмләткечләр;
- Кыздырылган ипи кисәкләре һәм креветкалар (табынга куйганда салу өчен).
Ашны әзерләү этаплары:
Ташкабакны кабыгыннан чистартабыз һәм шакмаклап турыйбыз. Кәстрүлгә салып утка куябыз, ташкабакны яртылаш күмәрлек итеп шулпа (яисә су) салабыз. Суган белән кишерне кыздырып алабыз һәм ташкабак янына салып җибәрәбез. Бәрәңге турап салырга да була. Яшелчәләр әзер булганчы 20-30 минут пешерәбез. Тоз һәм тәмләткечләр өстибез. Пешеп чыккан массаны блендер белән пюре итеп изәбез, каймак салабыз һәм тагын берничә минут кайнатып алабыз. Тәмле крем-аш әзер! Табынга куйганда кыздырылган ипи кисәкләре белән бизәргә, креветка салып җибәрергә була. Ашларыгыз тәмле булсын!