Ташкабактан ябыктыра торган аш
Әлеге аш диетадагы хатын-кызлар өчен файдалы, чөнки анда калориялар аз. Әзерләве дә тиз һәм җайлы.
Кирәкле ингредиентлар: 500 грамм ташкабак, 1 суган, 2 тырнак сарымсак, 1 кишер, тәменчә тоз, борыч, укроп яисә петрушка
Суган белән сарымсакны көнбагыш маенда кыздырабыз. Бераздан эре угычтан чыккан яисә вак итеп туралган кишер салабыз. 10 минутлап кыздырабыз. Өстенә ташкабак салабыз. 4 минут кыздырабыз. Аннан яшелчәләр капланганчы кайнар су салабыз. Ярты сәгать чамасы сүрән утта пешерәбез. Пешкәч, уттан алабыз. Блендерда әйләндерәбез. Ташкабактан аш-пюре әзер. Ашны укроп яисә петрушка белән бизибез. Аш янына сохарый куябыз.
