Тары ярмасы белән кабак пирогы
Кабак вакытында бу файдалы яшелчәдән тәмле ризыклар әзерләргә ашыгыгыз.
Ләйлә Мостафинадан тары ярмасы белән кабак пирогы рецептын тәкъдим итәбез.
Пирог өчен төче камыр әзерләргә.
Камыр өчен 1 стакан җылы суга 2-3 кашык үсемлек мае, 2-3 кашык майонез, көпшәкләндергеч, тоз, шикәр комы, он салып йомшак камыр басып куярга. Камыр бераз ял итсен.
Эчлек өчен 1 кг чистартылган кабакны угычтан уабыз. 200 грамм тары ярмасын юып, тозлы суга салып, пешерергә кирәк. Уылган кабакны тары ярмасы, тоз, борыч, шикәр комы, теләгән тәмләткечләр (паприка, розмарин) белән кушып болгатырга.
Камырны икегә бүлеп, бер өлешен җәеп, майлы табага салабыз, өстенә эчлек җәеп, 150-200 грамм эретелгән май яки маргарин салырга. Камырның икенче өлешен җәеп, эчлекне каплап, пирог ясарга.
Мичтә 200 градуста 30-40 минут пешерергә. Пирогны бераз суынгач, кисеп табынга бирергә була.
