Җырчы Фирдүс Тямаев тормыш иптәше Резеда белән ике малай тәрбияли. Гастрольләргә китәр алдыннан, каршысына утыртып, Тямаев улларына үгет-нәсыйхәт бирә икән. Әнә шул мизгелләрне Тямаев социаль челтәрләрдә күрсәткән.
«Егетләр, мин китәм концертка. Әниегезне тыңлагыз. Тәртибегез «5»лелек булсын! Хәзер аз гына уйнагыз, әниегез белән дәресләрегезне карагыз да, йокларга! Исән-саулар, яме», – ди җырчы.
Кечкенә улы Кәрим дә, «ярар» диясе урынга, әтисен кабатлап, «яме» дип куя.
«Иң беренче – гаиләдә тәртип», «Тәртип! Афәрин, егетләр! Тәрбия шуннан башлана», «Олысы үскән, җитдиләнгән», «Әти сүзе шундый була ул, булдырасың, Фирдүс», – дип хуплаганнар Фирдүсне язылучылары да. Кәримнең «яме»се дә виртуаль дусларының кәефен күтәргән.