Фәрит берничә ай элек эшсез кала Үзенең һөнәре буенча тиз генә эш табу мөмкинлеге булмый. Ә өйдә – тормыш иптәше Гөлчәчәк һәм кечкенә уллары Илдар. Ашау-эчү, көнкүреш чыгымнары үзеннән-үзе хәл ителми, әлбәттә. Шуңа күрә Фәрит вакытлыча булса да эш эзли башлый: хезмәт хакы күп булмаса да ярый, иң мөһиме – вакытында түли торган, артык авыр булмаган эш кирәк, дип уйлый ул.
Беркөнне дуслары белән сөйләшеп утырганда, якын танышы Илһам: «Минем бер танышым бар – Камил исемле. Ул складка эшчеләр эзли, – дип тәкъдим ясый. – Эше авыр түгел, вак-төяк әйберләрне төрү, җыю, тамгалау. Атна саен акча түлиләр, рәсми рәвештә эшкә урнаштыралар», – ди.
Фәрит шатланып ризалаша. Иртәгәсен үк Камил белән очраша. Ул беренче карашка ук гадел, тыныч табигатьле кеше булып күренә.
– Бер сәгатьлек күрсәтмә булыр, аннары эшкә керешерсең. Эш гади, тиз өйрәнерсең, – ди Камил.
Фәрит сөенеп, иртәнге якта складка килә. Чыннан да, эш катлаулы түгел: тартмаларны тутырырга, ябыштырырга, тиешле билгеләр куярга гына кирәк. Беренче мәлдә аңа монда озакка калмаса да, тыныч эш урыны тапкан кебек тоела. Әмма шатлыгы озакка бармый.
2 сәгать тырышып эшләгәч, Фәрит телефонына карап, хатыныннан килгән хәбәргә җавап бирмәкче була. Шул мизгелдә Камил аның янында пәйда була.
– Ни өчен эштән тайпыласың? – дип кискен сорау бирә ул. – Әлегә төшке ял вакыты түгел бит.
– Хатыннан хәбәр килде, шуңа гына карадым, – ди Фәрит, бераз аптырап.
– Ярар, төшке ялда җавап бирерсең. Монда видеокамералар бар, барысы да күзәтелә. Бу – кагыйдә бозу. Штраф салыначак, – дип, Камил түшәмгә ишарәли.
– Телефон караган өчен дә штрафмыни?
– Әйе, бездә тәртип шулай, – дип кырт кисә җитәкче.
Фәрит төшкә хәтле бөкрәеп эшли. Төшке вакыт җиткәч, эш эзләүгә вакыт калмый: ашханәдә чират, аннары ашап алырга кирәк. Шулай итеп, тагын эшкә керешә.
«Ярар, беренче атнаны үрнәк хезмәткәр булып күренермен, Камил йомшара төшәр, бераз җиңелрәк сулыш алырмын», – дип уйлый Фәрит. Әмма киресенчә булып чыга. Камил нәкъ менә аның артыннан гына күзәтеп йөргән кебек тоела:
– Моны дөрес ябыштырмагансың, яңадан эшлә.
– Штрихкод уңайсыз ябыштырылган.
– Товарны дөрес урнаштырмагансың, юлда ватылуы бар.
Башкаларга андый таләпләр бик сирәк куела. «Ярар, мин яңа кеше, өйрәтәдер», – дип түзә Фәрит. Бер сүз әйтми, барын да яңадан эшли. Ләкин 2-3 атна үтсә дә, Камилнең күзәтүе кимеми.
Аның каравы, Фәрит эшне инде күптән башкалардан җитезрәк башкара. Ләкин бу да җитәкчене йомшартмый. Көннәрдән беркөнне, Фәрит янә телефонга күз салган мизгелдә, Камил янә килеп чыга:
– Бу инде – икенче тапкыр. Гафу ит, әмма штраф салыначак.
– Нинди штраф инде?! – дип түземлеге бетә Фәритнең. – Мин монда вакытлыча гына эшлим. Эш авыр, акча күп түгел. Хәтта 2 минутка да ял итеп булмый! Эш эзләргә дә вакыт калмый!
– Без – хәйрия оешмасы түгел, – дип тыныч кына җавап бирә Камил. – Сине эшләсен өчен алдым. Барлык эшчеләр өчен бер үк кагыйдәләр.
Фәриткә чынлап та штраф салалар.
Хәзер инде ул икеләнү халәтендә. Яңа вакытлы эш эзләргә хәл калмаган. Монда ул инде барлык нечкәлекләрне белә, эшен яхшы башкара. Әмма җитәкченең даими басымы, һәр адымын тикшерүе, буш вакыт булмавы – аны тәмам арыган хәлгә китерә.
Чыгып китәргәме? Әлегә түзәргәме? Аның күңелендә җавап юк. Тик шунысы аермачык: өмет иткән «җиңел эш» – уйлаганнан күпкә авыррак булып чыга.
