Танышын үтереп, мәетнең башын болгарка белән кисеп алган Чаллы кешесен хөкем иттеләр
Җинаять эзен яшерү өчен, 53 яшьлек ир-ат мәетне елгага илтеп ташлаган.
2019 елда 28 сентябрьгә каршы төндә Чаллыдагы йортларның берсендә ике ир-ат исерек була, алар талаша башлый. Шуннан соң җинаятьче пычак ала һәм танышының күкрәгенә кадый. 53 яшьлек ир-ат яралана һәм урында ук үлә. Бу фаҗига турында «Челнинские известия» хәбәр итте.
53 яшьлек җинаятьче эзен яшерү өчен мәетне тураклый. Иптәше үлүен аңлагач, ул болгарка пычкысы ала һәм мәетнең башын кисә. Аннары мәетне хуҗалык сумкасына салып фатирдан алып чыга һәм елгага илтеп ташлый. Бу турыда ул үзе сөйләп биргән.
Башта мәетнең башы табыла, аннары водолазлар аның башка өлешләрен дә эзли.
Суд бу кешене үтерүдә гаепле дип тапкан һәм тугыз елга ирегеннән мәхрүм иткән. Бу вакытны ул каты режимлы колониядә үткәрәчәк, диелә бу хәбәрдә.