Танылган яучы Гөлназ Мөхәммәд чит ил кешесенә кияүгә чыккан
Шушы көннәрдә Татарстанның мөселман хатын-кызлары берлеге рәисе урынбасары, яучылык белән шөгыльләнүче Гөлназ Мөхәммәд үзеннән күпкә яшь егет белән никах укыткан.
Алар социаль челтәр аша танышкан. Мөхәммәд Алжирда туып үскән. Һөнәре буенча ул аш-су остасы һәм ландшафт дизайнеры.
– Яучы буларак, мин һәрвакыт гаиләле булу яклы. Һәрбер кеше бәхетле булырга, гаилә корырга тиеш. Ялгыз калгач мин һәрвакыт эзләнүдә булдым, үз кешемне табар өчен көч куйдым. Минем беренче ирем дә чит ил кешесе иде, Мөхәммәд тә Алжирдан. Чит ил халкы башка төрле була бит, аларның буыннан-буынга күчеп килгән аерым гореф-гадәтләре бар. Якыннарын бик хөрмәтләп яшиләр, Ислам кануннары буенча эш-гамәл кылалар.
Мөхәммәд белән 6-7 ай социаль челтәр аша аралаштык. Бер атна сөйләшкәннән соң ул мине ошатуын әйтте. Шактый вакыт ВК челтәрендә минем шәхси битемне өйрәнгән. Фотосүрәтләремне, язмаларымны, мин теркәлгән төркемнәрне күзәтеп чыккан. Мин дә аны якын күрдем, чөнки изге күңелле һәм яхшы холыклы ул. Бер тапкыр да өйләнмәгән, мин аның беренче мәхәббәте. Иң мөһиме тормышымны, балаларымны бик яхшы кабул итте. Җитди һәм төпле фикерле булуын үз иттем, 18 яшеннән үк эшли башлаган. Яшь аермасы безгә комачауламый. Киресенчә, ул Исламга нигезләнеп миңа үзенең киңәшләре белән ярдәм итә. Таяныч һәм терәк була белә, - дип сөйләде безгә Гөлназ Мөхәммәд.
Әлеге яшь гаиләнең ныклы, бәхетле, имин булуын телибез.