Танылган режиссерны урамда танышкан очраклы шешәдәше үз өендә чәнчеп үтергән
Танылган режиссерны урамда танышкан очраклы шешәдәше үз өендә чәнчеп үтергән
Кыска метражлы фильмнарның режиссеры Илья Тихановичны 12 февральдә урамда очраклы рәвештә танышып, өенә кунакка алып кайткан шешәдәше үтергән. Бу хакта "Московский комсомолец" газетасы яза.
Режиссер еш эчкән, хатыны бу гадәтеннән араларга тырышкан, иренең урамдагы исерекләр белән эчеп йөрүенә каршы көрәшкән. Илья исерек булганда тавыш чыгарган, сугыша башлый торган була.
12 февральдә Тиханович эш белән чыгып китә һәм урамнан бер ирне ияртеп кайта. Тамбов өлкәсеннән килгән бу кеше белән алар урамда танышканнар, ул кешенең үзе белән бер шешә аракысы була.
"Әлбәттә, мин ачуландым, аны урамга куып чыгармакчы булдым. Әмма бу ир үзен тыныч тотты һәм мин аңа өйдә калырга рөхсәт бирдем. Ул исемен әйтмәде, ирем белән кухняга кереп, эчә башладылар", - дип сөйләгән Екатерина.
Хатын икенче бүлмәдә балалары белән йокларга җыенганда, 22.00 сәгатьтә бу ир ишек шакый һәм тыныч тавыш белән ирен үтергәнен әйтә. Өйдәгеләр бернинди тавыш та ишетмәгән. Шуңа күрә Екатерина бу сүзгә ышанмый да - олы кызы белән кухняга йөгереп керә һәм муенына пычак кадалган ирен күрә.
Үтерүче фатирдан чыгып китә, хатын полициягә шалтырата. Үтерүче юлның икенче ягына гына чыгып өлгергән була - аягында көчкә басып торган ирне кулга алалар.
Екатерина исерек Илья тавыш чыгаргандыр, танышы шуның өчен үтергәндер дип фаразлый.
Әтисенең канлы гәүдәсен күргән кызга психологик ярдәм кирәк булачак. 13 февральдә ул имтихан бирергә тиеш булган, әмма хәзерге вакытта кыз имтихан бирерлек хәлдә түгел, дип яза газета.