Танылган көрәшче Илмир Төхвәтуллин никах укыткан
Көрәшче Илмир Төхвәтуллинның 23 февраль көнне никахы булган.
Көрәшче Илмир Төхвәтуллин сөйгәне Алия белән 23 февраль көнне никах укыткан. Бу хакта үзенең Инстаграм сәхифәсендә Илмирның дусты, тренер Булат Хәбибрахманов хәбәр итте. Ул үз инстаграм битенә яшь парның никахыннан фотолар куйган.
Инстачылар Илмир белән Алияне котлап, комментарийлар да калдырганнар. «Илмир брат, бәхетле булыгыз!», «Хәерле никахлар булсын. Котлыйм!», хәтта «Югалтык дустыбызны» дип язучылар да бар.
Илмир Төхвәтуллин көрәш сөючеләргә 90 кг үлчәү авырлыгында көрәшүче лидер буларак билгеле. Ул күптән түгел генә Биектауда «Ватаным Татарстан» газетасы гамәлгә куючы Муса Җәлил истәлегенә багышланган турнирда да беренчелекне яулады.
Шулай ук, Илмир Төхвәтуллин җырчы Ләйсән Мәхмүтованың «Язмыш әллә ялгыш» клибында төп рольне дә башкарган иде.