Россия халкы универсаль йомшак тәме һәм хуш исе өчен юкә балын, шулай ук тәмле тәме һәм сыек килеш озак саклануы өчен акация балын хуп күрә. Бу хакта үсемлекчелек буенча НТИ эксперты Юлия Баранкина РИА Новостига сөйләгән.
«Кайсы бал иң тәмлесе дигән сорауга мин һәрвакыт: шәхсән үзегезгә ошаганы һәм табигый булганы, дип җавап бирәм. Бездә традицион рәвештә юкә балын бик яраталар. Ул йомшак, хуш исле, кисен исе юк, чәйгә һәм десертларга яхшы туры килә. «Тәмле» тәмнең академик үрнәге буларак күпләр акация балын саный. Ул аксыл төстә, исе нәзакәтле һәм озак вакыт сыек килеш саклана», – дип сөйләгән ул.
Катлаулы тәм буларак төрле үләннәрдән җыелган балны яраталар – анда җәйге кыр, үләннәр, чәчәкләр, кайвакыт урман тәме дә чагылып китә, дигән ул. «Ә менә карабодай балы һәркемгә дә туры килми – караңгы төстә, тәме бераз авызны бөрештерә торган, катырак, кемгәдер кискенрәк тә булып тоела, ә кемдер аны нәкъ менә шушы холкы өчен иң яхшысы дип саный», – дигән белгеч.
Белгеч балны билгеләр җыелмасына – тәменә, исенә, табигыйлегенә һәм гадел этикеткасына карап сайларга киңәш итә. Сыйфатлы балдан карамель, спирт яки химик исләр килергә тиеш түгел. Балның консистенциясе яки үтәкүренмәле һәм агып тора торган яисә катламнарсыз тигез кристаллашкан булырга тиеш.
«Иң яхшысы кечкенә порцияләп төрле сортларны татып карарга һәм үз хисләреңә колак салырга кирәк. Шулай итеп үзегез өчен «иң тәмле» һәм туры килә торган балны таба алачаксыз», – дип киңәш итә Баранкина.
Аның сүзләренчә, балның тәме һәм сыйфаты аның нинди үсемлекләрдән җыелуына һәм бал аерту вакытының никадәр дөрес сайлануына да бәйле. Өлгергән, пичәтләнгән кәрәзләр һәм артык дым булмау – сыйфат билгесе.