Таиландта ял иткәндә Чиләбедән ике бала фаҗигале һәлак булган
Балалар ялга әби-бабайлары белән киткән була.
Бүген Таиландның Пхукет шәһәрендә ял иткән туристлар һәлакәткә юлыга. Диңгездә ике катер бәрелешкән дип яза The Phuket News. Аларның берсендә тай кешеләре, икенчесендә Россиядән 39 турист була. Ике бала — 12 яшьлек малай һәм 6 яшьлек кыз үлә. 21 россияле турист һәм Таиландның 3 гражданын хастаханәгә җибәрәләр. Берничәсе бик авыр хәлдә, дип хәбәр итә 74.RU
Россия илчелеге вәкилләре туристларның хәлләрен ачыклый.
Фаҗигадә һәлак булган малай һәм кыз — бертуганнар, алар икесе дә Чиләбедән. Катерлар маңгайга маңгай бәрелешә, ә балалар катерның борынында була. Алар Таиландта әбиләре һәм бабайлары белән киткән була. Әти-әниләре исә Чиләбедә калган.
Фаҗигагә юлыккач, аңсыз яткан балаларны тай кешеләре аңга китермәкче булган. Моны видеога да төшереп алганнар. Куркыныч кадрларны — тай кешеләренең бөтенләй белмичә, бер кул белән балаларга массаж ясарга тырышканнарын Таиланд мәгълүмат чаралары таратты.
Һәлак булган кыз бию белән шөгыльләнгән. Абыйсы исә бик яхшы укыган, төрле фәннәр буенча олимпиадаларда җиңгән.
Пхукет провинциясе губернаторы балаларның әти-әниләре 1 миллион сум компенсация алачак дигән.