Таиландта ял итүче Россия туристларына куркыныч янамый. Бу турыда РИА Новости яза.
Камбоджа белән Таиланд арасында конфликт кискенләшү аларның ялына тәэсир итми. Бу хакта Россия туризм индустриясе союзы (РСТ) матбугат хезмәте хәбәр итә.
Таиланд белән Камбоджа арасындагы чик низагы пәнҗешәмбе иртән кораллы бәрелешкә әйләнде. Чик буенда атышлардан соң яклар артиллерия утын ачты, Камбоджа Таиланд җирендәге гражданнар объектларына да «Град» системаларын кулланды. Таиланд исә Камбоджа Кораллы Көчләре позицияләренә авиаһөҗүм оештырды. Ике якта да үлүчеләр һәм яралылар бар, шул исәптән тыныч халык арасында да.
Таиландның Камбоджа белән чиктәш 4 провинциясендә халыкны эвакуацияләү игълан ителде, дип хәбәр итә «Nation» басмасы.
«Хәзерге вакытта Россия туристлары тулы иминлектә, әлеге вакыйгалар аларның ялына берничек тә тәэсир итми», – дип белдерде РСТ әгъзасы, «Satmarket» туроператорының генераль директоры Ирина Сетун сүзләренә таянып.
Союз билгеләп узганча, Россия туристлары еш йөри торган курортлар һәм башка урыннар конфликт зонасыннан шактый ерак урнашкан. «Чик буе киеренкелек башланганнан бирле Камбоджага оештырыла торган экскурсияләр тулысынча туктатылды», – дип өстәделәр РСТта.
