Таиландка Россиядән күченеп киткән 19 яшьлек Алексей А. һәлак булган. Баскетбол уйнаган чакта аны электр тогы суккан. Бу турыда «Вести» каналы хәбәр итте.
15 декабрьдә кич белән Паттайяда урамдагы мәйданчыкта егетләр баскетбол уйный. Ул Технология көллияте янында урнашкан. Туп багана янына таба очып китә. Алексей аны алырга дип иелә. Шул чакта егет җиргә ава һәм тормый инде.
Урынга табиблар килеп җиткәндә егет әле исән була, ләкин авырлык белән генә сулыш ала. Аны хастаханәгә китерәләр. Ләкин табиблар аны коткара алмый.
Полиция хезмәткәрләре тикшерү башлый. Алар мәйданчыкта өзелгән һәм изоляциясе булмаган берничә чыбык таба. Россиядән килгән егет шуларга орынган булуы ихтимал, диелә хәбәрдә.
Россия илчелегенең Бангкоктагы консуллык бүлегендә әлеге мәгълүматны раслаганнар.
Паттайяда бөтен спорт мәйданчыкларын вакытлыча япканнар, аларның иминлеген тикшерәләр.