Тәһарәт алырга мөмкинлек булмаса, тәяммүм алалар. Бу турыда «Хозур дин турында» телеграм-каналында «Ислам дине нигезләре» китабы буенча аңлаталар.
Тәяммүм – гыйбадәт кылыр өчен, су кулланмыйча гына, җир заты белән чистарыну ул.
Кайбер очракларда тәһарәт белән госелне алыштыра ала.
Тәяммүм – Аллаһы Тәгаләнең Мөхәммәд пәйгамбәргә салләллаһү галәйһи вә сәлләм һәм безгә – аның өммәтенә бүләге. Бу бүләк безгә гыйбадәт кылуны җиңеләйтер өчен бирелгән.
Тәямүммнең фарызлары:
- Ният итү.
- Чиста комга, туфракка (ком, туфрак булмаганда, тузанга) кулның учлары белән сугып алып, беренче тапкыр сукканнан соң – йөзне, икенче тапкыр сукканнан соң – кулларны, терсәкләрне дә кертеп, ышкып алу.
Тәямүммнең сөннәтләре:
- Бисмилләһне әйтү.
- Тәяммүмне үз тәртибе белән кылу.
- Озак туктап тормыйча башкару.
- Кулларны ком, туфрак өстендә башта алга, аннары артка таба йөртү.
- Комга, туфраккка сугып алганда, бармакларны йомарлап тотмаска.
- Кулларны бер-берсенә сугып, ябышып калган туфрак, комны төшерергә.
- Тәяммүмне намаз вакыты кергәч кенә алырга.
«Хозур дин турында» телеграм-каналында хәбәр ителгәнчә, тәяммүм алу өчен 3 төрле очрак бар:
- Тәһарәт яки госел алыр өчен, 2 чакрым арада җитәрлек микъдарда чиста су булмаганда.
- Су була торып та, аны кулланырга мөмкинлек булмаганда.
- Яра булу яки авыру аркасында суны кулланырга ярамаганда.
Калган барлык очракларда да су белән тәһарәт, госел алына.
Тәяммүм алу тәртибе
- Киемнең җиңнәрен терсәккә кадәр сызганырга кирәк. Кулда сәгать яки йөзекләр булса, аларны салып кую дөрес булыр.
- Тәһарәт яки госел урынына тәяммүм алу турында ният ителә. Әгузү-бисмилләһ әйтелә.
- Кул учларын ачып комга / туфракка / тузанга сугып алына. Аннан соң кулларны бер-берсенә бәргәләп, ябышып калган ком, туфрак, тузан калдыкларын төшерергә кирәк.
- Соңыннан кул учлары белән йөз сөртелә.
- Шуннан соң учлар белән икенче тапкыр бүтән комга / туфракка / тузанга сугып алына. Аннан соң кулларны бер-берсенә бәргәләп, ябышып калган ком, туфрак, тузан калдыкларын төшерергә кирәк.
- Башта сул кулның учы белән уң кул сөртелә, аннары уң кулның учы белән сул кул сөртелә.
Ике очракта да терсәкләрне кертеп сөртергә кирәк, диелә «Хозур дин турында» каналында.
