Тагын янгын: күп балалы хатын, аның сабый баласы, бер ир-ат һәлак

Башкортстанның Еәнсура районының Иделбәк авылында коточкыч фаҗига булган. 24 февральдә көндезге уникенче яртыда агач йортта янгын чыга. Өч кеше янып үлә, бер кеше хастаханәдә, ике бала котыла алган. Бу турыда «Башкинформ» агентлыгы хәбәр итә.

Янгын урынына коткаручылар, ашыгыч ярдәм һәм җирле үзидарә вәкилләре дә бара, дип сөйләгәннәр агентлыкка Башкортстан буенча Гадәттән тыш хәлләр министрлыгы идарәсендә.

Агач бүрәнәләрдән буралган йорт тулысынча ут белән чолгап алынган була. Янгын хәрабәләрен актарганда, коткаручылар өч кеше мәетен таба. 34 яшьлек хатын-кыз, аның яшь ярымлык ир баласы һәм шәхесе әлегә ачыкланмаган ир-ат янып үлгән.

Янгын урынында булган 51 яшьлек хатын-кызны хастаханәгә илткәннәр. Янгында һәлак булган хатын күпбалалы булган. Аның 15 яшьлек кызы һәм 7 яшьлек улы яна торган йорттан чыгып котыла алган, диелгән әлеге хәбәрдә.