Җырчы, алып баручы Зөлфәт Зиннуров белән тормыш иптәше Гөлназ өченче тапкыр әти-әни булачак, дип хәбәр иткән идек. Зөлфәт Зиннуров социаль челтәрдәге сәхифәсенә гаиләсе белән төшкән яңа фотосын урнаштырган. Шаян Зөлфәт белән кызлары әниләренең инде шактый түгәрәкләнеп килгән корсагына бомба рәсеме ясаганнар. Ә үзләре фотога «шартлый күрмәсен» дигән кебек курыккан кыяфәттә төшкән.
Әлеге посты астында Зөлфәт болай дип язып куйган:
«Мин бәләкәй вакытта бабай сорау биргән иде:
Улым, ә беләсеңме, дөньядагы иң авыр эш – ул нинди эш?
Таш ташу? Тимер күтәрү?
Юк, улым, көтү.
Сыер көтүеме, бабай?
Юк, кеше көтү.
Әле аннан да авыррагы бар икән – хатын-кызны көтү. Көтәбез», – дип яза Зөлфәт.
«Сез генә түгел, без дә көтәбез инде, Зөлфәт. Хәбәр юкмы икән дип, һәр көнне сәхифәңә кереп карыйм», «Исән-сау табарга язсын», – дип язган җырчының виртуаль дуслары. Алар арасында, Гөлназның корсагына карап, баланың җенесен фаразлаучылар да күп. «Малайга охшаган. Таза-сау бала булсын», «Малай булсын инде», «Малайдыр. Малай кирәк инде. Бәләкәй Зөлфәт», – дип яза аларның бер төркеме.
Икенчеләре, Зиннуровлар гаиләсендә тагын бер кыз бала туар, дигән фикердә. «Кызга охшаган. Кем булса да, сау-сәламәт тусын», «Тагын кызмы әллә?» – дип язып калдырганнар алар.
Фото: © социаль челтәрләр