Татар теле — туган телем, дибез. Әмма сөйләмебезгә, үзебез дә сизмәстән, еш кына рус сүзләре керә. Бу процесстан соң татар телен нинди үзгәрешләр көтә? Татар теленең үз сүзләрен уйлап чыгару өчен нишләргә? Бу хакта «Татар-информ»га КФУның Милли мәдәният һәм мәгариф югары мәктәбе профессоры Гөлшат Галиуллина сөйләде.

Татар теле алынмалар белән чуарланган, үз сүзләребез инде калмаган да дигән фикерне ишетергә туры килә кайчак. Рус һәм башка телләрдәге сүзләрне никадәр еш кулланабыз соң?«Татар-информ» хәбәрчесе, Татар теленең язма корпусы ярдәмендә, телдә башлыча төрки сүзләр кулланылуын ачыклады.