Терапевт Евгений Космынин сүзләренчә, көньяк төбәкләрдә ял итү организмда D витамины ясалуын гарантияләми. Аның тиредә синтезлану интенсивлыгы кояш нурларының төшү почмагына, тәүлек вакытына һәм ел фасылына бәйле. Бу турыда «РИА Новости» яза.
«Хәтта көньяк киңлекләрдә дә болытлылык, һаваның пычрануы һәм аэрозольләр тиредә D витамины синтезын киметергә мөмкин. Алар ультрашәмәхә нурланышны тирегә барып җиткәнче үк тарата. Кышын хәтта көньякта да кояш бик түбән тора, шуңа күрә тиредә D витамины ясалуын стимуллаштыра алмый», — дип сөйләгән табиб.
Белгеч D витамины синтезына кояштан саклаучы кремнарның да йогынты ясавын билгеләп үткән. Алар тиредә витамин ясалуын сизелерлек киметергә мөмкин. Кешеләрнең эссе сәгатьләрдә күләгәгә качуы һәм кояшта пешмәс өчен тәнне каплый торган кием киюе дә ультрашәмәхә нурларның тирегә тәэсирен чикли.
Табиб D витаминының организмда үзләштерелүенә дә игътибар иткән. Бу — майда эри торган витамин, шуңа күрә аны эчәклектә үзләштерү өчен үт һәм ашказаны асты бизе ферментлары кирәк.
Хроник панкреатит, Крон авыруы һәм целиакия кебек ашкайнату системасы авырулары вакытында бу процесс бозылырга мөмкин. Нәтиҗәдә, хәтта D витаминының югары дозалы өстәмәләре дә көтелгән нәтиҗәне бирмәскә мөмкин.
Моннан тыш, магний D витаминын бавырда һәм бөерләрдә активлаштыруда катнаша. Организмда бу минерал җитәрлек булмаса, D витамины актив булмаган формада калырга һәм үз функцияләрен тиешенчә башкара алмаска мөмкин, дип аңлаткан Евгений Космынин.