«Түшәм ишелгән» - Ике сабый һәм аларның анасы янып үлгән, дүрт бала ятим калган

13 мартта кичке сигезләр тирәсендә Новосибирск өлкәсенең Сузуновский районындагы Бобровка авылында күп балалы гаилә яши торган йортта янгын була. Фаҗигадә ике бала, аларның анасы үлә. Бу турыда «Комсомольская правда» хәбәр итте.

«Кич белән 35 яшьлек хатын һәм аның дүрт баласы — 4, 7 һәм 11 яшьлек малайлар, 2 яшьлек кыз — өйдә була. Хатынның тагын ике баласы әбиләренә кунакка киткән», — дип сөйли авылдашлары.

Фаҗига булган гаилә турында күршеләре яхшы сүз әйтә алмый. Алты бала анасы салгалап йөри, беркайда да эшләми. Махсус хезмәтләр ни караганы да билгесез, диләр.

«Балаларның атасын да белмибез. Аның биредә күренгәне дә юк», — дип уфтана авылдашлар.

Якынча версия буенча, янгын балалар саксызлыгы аркасында килеп чыккан булуы ихтимал. «11 яшьлек малай мичкә якмакчы булган, ләкин шул чакта янгын килеп чыккан. Ул өйдән 4 яшьлек энесен алып чыгарга өлгергән, ләкин калганнарын коткара алмаганнар», — дип хәбәр иткәннәр Россия Тикшерү комитетының Новосибирск өлкәсе буенча Тикшерү идарәсендә.

Шулай итеп 2 яшьлек кыз, 7 яшьлек малай һәм аларның анасы һәлак була.

«Алар өстенә түшәм ишелеп төшкән, котылу ихтималы булмаган инде», — ди күрешләре.

Тикшерүчеләр җинаять эше ачкан, фаҗига сәбәпләрен белгечләр ачыклый, диелә бу хәбәрдә.