Төркиягә барганда нәрсәләрне истә тотарга кирәк? - Чулпан Гарипова киңәшләре

Тамада Чулпан Гарипова үзенең “Инстаграм” битендә Төркиягә бару тәэсирләре белән уртаклашты. Шулай ук ул инстадусларына әлеге илгә барганда белеп торырга кирәкле киңәшләрне дә әйтеп узды.

“1. Төркиягә хәзер доллар белән килсәгез, аны рәсми төстә алыштыру юк. Банкларда алмыйлар. Ә кибеттә товарны доллар белән алу лира белән алуга караганда кыйммәткәрәк чыга.

2. Иң яхшысы – “Сбербанк” картасы белән түләү. Ә доллар белән булсагыз, сезгә ябанчы (иностранец) итеп карыйлар һәм махсус кыйбат бәя әйтәләр.

3. Әгәр инде доллар белән килгән булсагыз, һичьюгында, маркетларда доллар белән түләп, сдачага лиралар алырга була.

4. Лира – бик тотрыксыз валюта. Бүгенге көндә рәсми төстә 1 лира – 13 сум 50 тиен булса, маркетлар аны кайчак – 14, кайчак 15 сум исәбеннән ала.

5. Тагын бер яңалык. Төркиядә 2018 елның 1 сентябреннән барлык кибетләрдә пакетларны түләүле ясаганнар. Төркия хөкүмәте экологиягә сачыл караш йөзеннән махсус шундый әмер биргән. Ашамлыклар кибетендә пакет 0,25 куруштан (14 сумның дүрттән бере – безнеңчә 3 сум 30 тиен) башлана. Зуррак пакетка бәя дә зуррак”, - дип хәбәр итә ул.