Төркиядә көчле җил бер ир-атны җирдән күтәреп алган — видео

Төркиядә шторм җиле бер ир-атны очыртып алып китә язган. Бу кеше урамда торган зур зонтка тотынган булган. Әлеге вакыйга кадрларын РЕН ТВ каналы күрсәтте.

Биредәге матбугат чаралары хәбәр иткәнчә, Төркиянең көньягындагы Османия шәһәрендә давыл чыга. Кешеләрнең табигать көчләре белән көрәшкән мизгелләрен җирле газетаның Твиттердагы сәхифәсенә куйганнар.

Кадрлардан күренгәнчә, урамда көчле җил котыра, биредәге кешеләр аяк өстендә басып калырга тырыша. Ир-атлар зур зонтка ябыша, аның нигезенә менеп басмакчы булалар. Шул вакытта шторм җиле бу зонтны күтәреп ала. Ир-атларның берсе зонт нигезенә басып торган килеш җирдән күтәрелә һәм 3–4 метрга очып китә. Бәхеткә, ул имгәнмәгән, диелгән бу хәбәрдә.

«Зонт югарырак күтәрелгәнен аңлап алгач, мин сикереп төштем», — дип сөйләгән бу кеше.