Төркиядә 1670 елда төзелгән мәчеттә янгын чыккан
Истанбул шәһәрендәге борынгы мәчет тулысынча диярлек агачтан төзелгән.
Бүген, 15 ноябрьдә, Төркиянең Истанбул шәһәренең Өскедар районында урнашкан борынгы мәчеттә янгын чыккан. Бу турыда Төркия басмаларына сылтама белән РЕН ТВ сайты хәбәр итте.
Басма мәгълүматлары буенча, янгын сүндерүдә берничә команда катнаша. Әлегә янгын сәбәпләре билгеле түгел. Тарихи корылмага шактый зур зыян килүе турында хәбәр ителә.
1670 елда төзелгән Ваникёй мәчете Босфор култыгы ярында урнашкан. Ул тулысынча агачтан төзелгән. Бүгенге көнгә кадәр анда гыйбадәт кылу рөхсәт ителә иде.
Шаһитлар янгын видеосын социаль челтәрләрдә тарата. Кадрларда мәчеттән төтен чыгуы күренә, аннары ялкын телләре чыга башлый.