Тәрәз төбемдә... зират: Иске Шигали халкы яңа зират урынына каршы
Яңа зират урыны белән шәхси йорт арасында 10 метр да ара юк.
![Тәрәз төбемдә... зират: Иске Шигали халкы яңа зират урынына каршы](https://intertat.tatar/resize/shd/images/uploads/news/2017/11/23/1e87cb139299fe8575ec52e258cba8e625c73a3dc7886c4a3d14d0d11559.jpg)
Үзара салым акчасы – авыл җирлеге башлыкларының дүрт күз белән көтеп торган кереме. Референдум узганчы ук, җитәкчелек инде аны кая тотасын уйлап куя. Күпчелек авыллар шуның хисабына юллы була, икенчеләргә ут, су кертә. Ә менә Питрәч районының Иске Шигали авылында узган елгы үзара салым акчасын авыл уртасында койма тоту өчен тотканнар. Авыл уртасында койма нигә кирәк диярсез? Җавабы шул – киләчәктә бу урын зират булып, каберләр калкып чыгачак. Билгеле, кемнең авыл уртасында зират булдырасы килсен, Шигали халкы да моңа каршы чыккан, – дип хәбәр итә “Татарстан24” каналы.
Моңа кадәр авыл зираты читтә булган. Ул берәүгә дә комачау итмәгән. Ә хәзер исә җирле хакимият авыл уртасында буш торган урынны зират итәргә уйлый.
Яңа зират коймасы белән шәхси хуҗалык арасында 10 метр да ара юк. Җирле халыкны куркыткан күренеш: йокыдан тору яки төнлә кинәт уянып китүгә, тәрәз каршындагы каберләр белән күзгә-күз очрашу.
Яңа зират мәсьәләсе, нигездә, Иске Шигали халкының урта һәм яшь буынын күбрәк борчый. Авыл җирлеге башлыгы белән очрашуда да төп масса шулар.
![](/resize/750/images/uploads/news/2019/11/17/31248916a7bdce43e63d8416fdd0b5b3a775f8a5a0a0a788ce57aad496d3.jpg)
– Һичшиксез судка бирәбез, бу мәсьәләне хәл итәчәкбез, – ди Шигали җирлеге башлыгы Фәрхәт Сәләхиев.
Аның сүзләренчә, зират өчен җирне, йортлар төзергә рөхсәт бирелгәнче үк, бүлгәннәр.
![](/resize/750/images/uploads/news/2019/11/17/8c814d88952f6f9829fb18f5fe562725a54a9931784a406f24065c153d5c.jpg)
Авыл халкы аптырашта, янәсе, зират урыны алдан билгеле булгач, нигә безгә йорт салу өчен бу җирләрне саттыгыз соң? Җитәкченең моңа да җавабы әзер: "Моны сезгә мин сатмадым”.
Әмма бердәм авыл халкы тынычланмый: “Сез бит хакимият вәкиле, димәк, сез төзелешкә рөхсәт биргәнсез!” - ди алар.
Фәрхәт Сәләхиев сүзләренчә, авылга койма кирәклеге хакында җирле референдумда хәл ителгән. Әмма булачак зиратка терәлеп үк торачак йорт хуҗалары бернинди җыен турында белми. Референдумга аларны берәү дә чакырмаган.
– Без монда койма коюгызга каршы түгел. Куелган икән, торсын. Без монда кеше җирләнүгә каршы, – ди Шигали халкы.
Бер активист сүзләрен икенчесе күтәреп ала:
![](/resize/750/images/uploads/news/2019/11/17/b5afa85649fbb19d1cc1131e1adcfcd73ec0b0409e0b40ab5ba8281ae0af.jpg)
– Әгәр сезнең өегез монда торса, сез шушылай җыен җыймас идегезме? Сезнең өегез монда булса, сез бу урынны зиратка тәгаенләп, койма кормас та идегез, – дип ярсый кулына яшь бала күтәргән ханым.
Авыл җирлеге башлыгы, әлеге зират урыны санитар нормаларга туры килә дигән сүзне алга сөрә. Әмма халык җитәкчеләренең бу сүзенә дә каршы чыкты.
![](/resize/750/images/uploads/news/2019/11/17/12d2c62a994520dbf25c0a51ac66b44a719a81b5d2e2e0cca3fcebfa7523.jpg)
– Ничек туры килсен, менә, мин сезгә барысын да күрсәтә алам, хәер, ник күрсәтергә соң, сез бит аның туры килмәвен болай да беләсез”, – ди сүзендә нык торучы яшь ир.
Җитәкче сүзләренчә, яңа зиратка әле 10-15 еллап кеше җирләнмәчәк. Чөнки иске зиратта урын җитәрлек. Шуңа күрә, зираттагы каберләрне Шигали халкының бүгенге буыны түгел, әнә шул әнисе кулындагы бала күрәчәк.
![](/resize/750/images/uploads/news/2019/11/17/84bfae7d4c117b49fa41e1f4c2d542ddb46d5106a7b4f3b320195c0dbaa5.jpg)
Активистлар инде санитар-эпидемия хезмәтенә дә мөрәҗәгать иткән. Әгәр боз кузгалмаса, авыл халкы бу мәсьәлә буенча соңгы сулышына кадәр көрәшәчәк. Бу хакта алар прокуратуга язарга, судка бирергә җыена.
![](/resize/750/images/uploads/news/2019/11/17/6fc48beb461e3d61d4860fc1ac5ed59c2d55030c76778d0f2c991caee2d0.jpg)