Тәрәзә челтәрләрен ничек агартырга?
Сода, тоз, нашатырь, кер сабын челтәрне агарта.
Ак төсле тәрәзә челтәрләре гадәттә саргая, аларга тузан куна башлый. Тюльне агарту ысуллары dom.mail.ru. киңәшләр сайтында чыкты.
Караңгылана башлаган челтәрне аш содасы белән агартып була. Җылы суда ике аш кашыгы сода эретегез, ике аш кашыгы кер прошогы салыгыз. Бөртекләр барысы да эреп бетәргә тиеш. Шушы эремәдә челтәрне 30-40 минут җебетегез дә юыгыз.
Аш тозы майлы тапларны бетерә, ак төсне кайтара. 10 литр суга ярты стакан кер порошогы һәм тоз салыгыз, болгатыгыз. Челтәрне 12-14 сәгать җебетегез дә юып алыгыз.
125 миллилитр нашатырь спиртын 10 литр суга кушып болгатыгыз. Челтәрне шунда салып, 12-24 сәгать җебетегез, аннары юыгыз.
Крахмал порошогы да челтәрне агарта. Бер стакан крахмалны бер стакан суда җебетегез, төерләре калмасын. Шуны 5-6 литр суга кушыгыз, яхшылап болгатыгыз һәм челтәрне 6 сәгать җебетегез. Аннары җиңелчә генә сыккалап алыгыз да киптерегез.
Кер сабынының соры төсле 72 процентлысы челтәрне агарта. Бер сабынны зур тишекле угычтан уыгыз, шушы йомычка өстенә өч литр кайнар су салыгыз, сабын эреп беткәнче болгатыгыз. 4-5 литр салкын су кушыгыз, яхшылап болгатыгыз. Шушы эремәгә челтәрне салып, 12-15 сәгать җебетегез дә юып киптерегез.